Máis cortes de rúa en Vite, Raxoi e Pontepedriña

A instalación de varios guindastres afectará á circulación ·· Arranxo de beirarrúas na Avenida de Castelao

A reurbanización da rúa Raxoi obrigará a cortar o tráfico a partir do luns, no tramo que vai das escaleiras que conectan coa rúa Rodrigo de Padrón ata a praza do Obradoiro. Tamén se prohibirá o estacionamento nesta zona, unha restricción que se manterá ata o final das obras, segundo informaba onte o Concello de Santiago.

Tamén a partir do luns se iniciará a rehabilitación dun tramo da beirarrúa da Avenida de Castelao, desde a confluencia coa rúa Domingo de Andrade ata o cruce coa rúa Carlos Maside. A beirarrúa afectada será a da man dereita en sentido subida, e nesa zona prohibirase o estacionamento. Aínda que as obras non afectarán ao tráfico de vehículos si se prohibirá o paso dos peatóns, para os que se habilitará unha pasarela alternativa.

A instalación dun camión-formigón na rúa Vite de Arriba, á altura do número 19, obrigará a cortar o tráfico, tamén o luns, desde as nove da mañá ata a unha do mediodía.

No barrio de Pontepedriña, na rúa Ulla, a instalación dun guindastre afectará ao tráfico entre as oito da mañá e as sete da tarde. O carril que quedará libre terá circulación alternativa nos dous sentidos, regulado polo persoal da obra.

Estas restriccións sumaranse ás rúas cortadas polo túnel do Hórreo e as obras de Conxo e o Ensanche.

Para ler a nova no seu lugar de orixe, preme aquí

O Concello cortará varias rúas o luns pola realización de obras de rehabilitación

Con motivo da realización das obras de reurbanización da rúa Raxoi, a partir do próximo luns quedará cortada ao tráfico esta rúa, desde as escaleiras que a comunican con Rodrigo de Padrón ata a praza do Obradoiro. Tamén quedará prohibido o estacionamento. As restricións manteranse ata que finalicen as obras.

A partir do luns tamén se levarán a cabo traballos de rehabilitación nun tramo da beirarrúa da avenida de Castelao, en concreto a que vai desde a confluencia desta avenida coa rúa Domingo Andrade ata a inserción con Carlos Maside. A beirarrúa afectada é a que se sitúa a man dereita en sentido de subida, onde non se poderá aparcar. As obras non afectan ao tráfico rodado, mentres que os peóns disporán dunha pasarela alternativa.

A rúa Vite de Arriba tamén se verá afectada por un corte de tráfico, neste caso á altura do número 19. A restrición terá lugar o luns, de 9.00 a 13.00 horas. De 8.00 a 19.00, ese mesmo día, cortarase un carril na rúa Ulla pola colocación dun guindastre.

Para ler a nova no seu lugar de orixe, preme aquí

O novo Vite de Arriba motiva a primeira modificación do PXOM

Implica a construción e o peche dunha peza urbana «preciosa» aos pés do Monte de Deus.

A construción e acabado dunha peza urbana que pecha a cidade en Vista Alegre, aos pés do Monte de Deus, significou a primeira modificación que recibe luz verde do Plan Xeral de Ordenación Urbana (PXOM). Aínda que houbo un par de cambios de uso en Salgueiriños (para uso educativo) e A Choupana (para un aparcadoiro provisional), en realidade esas tramas xa figuraban no plan anterior e en puridadade a de Vite de Arriba é a primeira modificación urbanística do novo PXOM.

A muda do ordenamento ten por obxecto proporcionar uns accesos adecuados ao ámbito de actuación (sud-7) de Vite de Arriba, que posúe unha superficie total de 59.000 metros cadrados, e lograr unha mellor integración do sector no seu contorno. Así mesmo, increméntase a zona verde en preto de medio milleiro de metros cadrados. O cambio de planeamento será aprobado polo próximo pleno municipal.

O obxecto do plan (que inclúe unha área suxeita a expropiación) é completar os espazos baleiros nos bordos do chan urbano existente que permita o remate e a transición entre o polígono de Vite e os núcleos de Vite de Arriba e de Abaixo, anexionándoos á cidade. Esa continuidade urbana farase a través dun uso residencial de baixa intensidade (un máximo de 33 vivendas por hectárea) e unha edificabilidade máxima de 0,40 metros cadrados por metro cadrado.

Ao redor dun centenar de vivendas terán cabida no sector. A vivenda familiar ocupará un 40%. Os usos comerciais e complementarios absorberán o 20% da edificabilidade na planta baixa. A altura dos edificios non superará as tres plantas. A construción desta peza de Vite está en mans de dous arquitectos de garantías como Xerardo Estévez e Ángel Alonso.

Unha das características desta ordenación (que se estrutura nun eixo lonxitudinal que comunica a estrada de Santa Comba e Vista Alegre con varios puntos do polígono de Vite) é que se desenvolve na ladeira do monte e ten que adaptarse a esa topografía. A vivenda colectiva situarase na parte baixa.

«É unha peza moi bonita, preciosa, debaixo do Monte de Deus», resalta a concelleira de Urbanismo, Mercedes Rosón.

• Relacionados da noticia

Unha zona pouco rechamante que pasa a ser un escenario atractivo

O Sud-7 achegará unha nova fisionomía urbana na que terán cabida, xunto aos usos edificativos, equipamentos e zonas verdes na parte inferior dunha atractiva paraxe natural. A parte alta foi obxecto recentemente dunha intervención transformadora que supuxo a construción dun miradoiro, así como a limpeza e tratamento da contorna.

Os traballos, a cargo do departamento municipal de Medio Ambiente, implicaron a instalación de mobiliario, o acondicionamento dunha área de usos polivalentes, a apertura dun carreiro e a mellora dos elementos arquitectónicos existentes nesa zona. A intervención completarase con outras actuacións, entre elas a incorporación de especies vexetais autóctonas. Esta segunda fase estará finalizada a finais deste ano e completará o desenvolvemento paisaxístico dunha área global de 30.000 metros cadrados, dos que se abordaron 6.000.

Coas actuacións reflectidas no teito e nos baixos de Vite, este escenario de barrio urbano, que ata o momento resultaba distante e pouco rechamante para os composteláns, pasará a ser un conxunto atractivo nesta parte da cidade.

Para ler a nova no seu lugar de orixe, preme aquí

O Concello creará unha brigada de obras para o Urbana Norte que dará traballo a 45 persoas

O Concello creará un equipo de traballo para afrontar pequenas obras do plan Urbana Santiago Norte e farao a través dun programa de inserción laboral similar ao dun obradoiro de emprego, no que se combinarán a formación e a execución de obras, segundo a portavoz da Xunta de Goberno, a nacionalista Socorro García, quen onte deu conta do visto e prace dese órgano a esta iniciativa. O programa permitirá inserir laboralmente a 45 persoas durante un ano.

Os interesados en participar deste equipo poden presentar as súas solicitudes entre o 20 de novembro e o 10 de decembro. O programa enmárcase na actuación Iniciativa Urbana de Obras e Emprego e ten como obxectivos específicos a aplicación de políticas tendentes a diminuír o nivel de desemprego na zona do plan Urbana -terán preferencia esas solicitudes- e con especial atención aos colectivos con máis dificultades de acceso ao traballo.

O programa está destinado a persoas desempregadas que poidan acreditar formación ocupacional ou regulada para os diferentes postos ofertados, 42 oficiais de terceira e tres responsables de equipo, que estean en exclusión laboral e que residan en Vista Alegre, Romaño, Vite, Guadalupe, Salgueiriños, San Caetano, Basquiños, Ultreia, Espírito Santo, A Estila, A Almáciga, San Pedro, Concheiros, Belvís e Quiroga Palacios, o ámbito de actuación do Urbana Norte.

Para ler a nova no seu lugar de orixe, preme aquí

O Auditorio renova a súa cuberta cun investimento de 140.000 euros para eliminar filtracións

As obras están practicamente concluídas e xa se proxecta a mellora do aparcadoiro

O Auditorio estreará cuberta nova en breve. As obras, nas que se investiron 140.000 euros, están practicamente concluídas, segundo puido constatar onte a concelleira de Cultura, a nacionalista Socorro García Conde, na visita que cursou ao recinto para coñecer o alcance desta actuación en compañía do director xerente do mesmo, Paulo Rodríguez, a arquitecta responsable da reforma, Cristina Ouzande, e o director técnico do Consorcio, Ángel Panero. Iniciada fai tres semanas, a actuación consiste na renovación total do tellado para solucionar os problemas de filtracións pola deterioración das unións entre as láminas de cobre da cuberta orixinal, o que producía problemas de pingueiras.

Cando se construíu o edificio, en 1989, as técnicas construtivas levaron a instalar láminas de cobre de non máis dun metro de ancho, ensambladas mediante múltiples soldaduras. Agora, esas placas substituíronse por outras de vinte metros de ancho, o que permite reducir de forma considerable o número de xuntas, e polo tanto incrementar as condicións de seguridade de impermeabilidade.

Pero a intervención non só consistiu na substitución do metal da cuberta, senón que tamén se acometeron labores de limpeza e reparación do soporte do tellado con morteiro, ademais de proceder á instalación dunha lámina de illamento de polietileno e outra de ventilación.

Segundo Socorro García, logo de vinte anos é preciso traballar para que o Auditorio «preste a súa función como contedor cultural nas mellores condicións», e nesa liña, e ao amparo do Plan Director deste equipamento, recentemente acometéronse tamén actuacións para favorecer a súa seguridade en materia de incendios e instalouse un sistema de vídeovixilancia. E agora mesmo están en proceso de contratación as obras de mellora dos accesos e do aparcadoiro subterráneo, aínda que se prevé tamén máis adiante a remodelación da explandada dianteira, para convertela nunha praza pública que permita varios usos.

Para ler a nova no seu lugar de orixe, preme aquí

A reforma da avenida Castelao comezará a mediados de mes

O tráfico manterase en ambos os sentidos, salvo en momentos puntuais en que deba darse paso alterno

A reforma da Avenida de Castelao comezará cara a mediados deste mes. De feito, o concelleiro de Infraestruturas, o socialista Bernardino Rama, confía en que poida ser antes de dez días, despois de que a Xunta de Goberno aprobase onte a adxudicación definitiva da súa reurbanización á empresa Jesús Martínez Álvarez S.A. por importe de dous millóns de euros, ademais do IVE, o que supuxo unha baixada do 25% sobre o prezo con que o proxecto saíu a licitación. A obra deberá executarse nun prazo de oito meses, co que debería estar dispoñible no verán próximo.

Quitando as melloras na avenida do Camiño Francés, unha intervención moito máis moderada tanto no seu alcance reformador como investidor, a da Avenida de Castelao será a primeira das grandes obras do plan de travesías que fai uns anos concertaron a Xunta e o Concello e o polo cal a primeira destas Administracións achegará 10 millóns de euros, e a segunda, catro. A actuación neste caso seguirá o modelo reurbanizador da avenida Mestre Mateo e a nivel técnico aproveitarase para mellorar os peraltes, que están mal.

O tráfico manterase nos dous sentidos de circulación, salvo en momentos puntuais que por actuación sobre a calzada sexa necesario regulalo para dar paso alternativo. Asúmese que cando se actúe sobre os peraltes será necesario proceder a esa regulación, aínda que non así mentres se realicen as obras de reurbanización de menor impacto. A actuación levará a subterraneización dos colectores de lixo e farase unha rotonda para regular o tráfico no cruzamento da avenida coa rúa Ulpiano Villanueva e a avenida do Burgo.

Antes de que conclúa este ano está previsto que comecen tamén as obras de reurbanización de Galeras, Salvadas e a rúa Vista Alegre, até a confluencia coa subida de Vite. O proxecto está en fase de licitación e posiblemente a actuación adxudíquese de forma inicial a próxima semana. En canto á travesía de Santa Marta, entre Romero Donallo e a rotonda da Rocha, estase coa apertura de plicas das ofertas presentadas. A primeira destas dúas obras superará os 4 millóns de euros, e a segunda, os 3.

Para ler a nova no seu lugar de orixe, preme aquí

Arrinca a reurbanización da Avenida de Castelao

A xunta de goberno local aprobou onte a adxudicación provisional de dúas obras de reurbanización de espazos públicos na cidade. Trátase dos traballos previstos para a Avenida de Castelao e a calzada de Santo Antonio.

No primeiro caso, é un proyecto que contará con financiación do Concello e a Xunta, xa que forma parte do acordo para a remodelación dos principais acesos á cidade asinado entre ambas administracións. A empresa adxudicataria foi Jesús Martínez Álvarez, que conta cun prazo de execución de oito meses para completar os traballos. O importe do contrato ascende a 2.000.000 de euros.

[...]

Para ler a nova no seu lugar de orixe, preme aquí

Contratan a reforma da avenida Castelao en 2 millóns, un 25% menos do licitado

A Xunta de Goberno adxudicou onte de forma provisional as obras para a reforma da Avenida de Castelao, a primeira intervención das previstas no plano de travesías concertado pola Xunta e o Concello. A adxudicataria foi a empresa Jesús Martínez Álvarez, que realizará a reurbanización por dous millóns de euros, un 25,5% menos do prezo de licitación, que ascendía a 2.682.758 euros, sen o IVE en ambos os casos. Con todo, esa non foi a única rebaixa da empresa que gañou o concurso, que se comprometeu a realizar a obra en oito meses, fronte ao prazo máximo de 12 que recollía o prego.

Esta avenida reurbanizarase seguindo o modelo de Mestre Mateo e as obras comezarán en novembro, pois aínda han de transcorrer quince días ata a adxudicación definitiva e logo proceder á firma do contrato.

[...]

Para ler a nova no seu lugar de orixe, preme aquí

A reforma da avenida Castelao, a primeira do plano de travesías, comezará en novembro

O Concello adxudicará provisionalmente o vindeiro martes as obras de reforma da Avenida de Castelao, o primeiro dos proxectos de mellora dos accesos da cidade programado no plan de travesías que conveniaron a Xunta e o Concello fai uns anos. Tras esta adxudicación haberá que esperar á definitiva (quince días despois) para poder formular o contrato, co que as obras non comezarán ata novembro. O investimento roldará os tres millóns. Agora mesmo están tamén en proceso de licitación as intervencións en Galeras-Salvadas e na entrada da estrada de Pontevedra, entre Rosalía de Castro e a rotonda da Rocha.

Para ler a nova no seu lugar de orixe, preme aquí

Interminábeis colas en Vite

Caos • Na Escola Oficial de Idiomas fixeron garda para conseguir unha praza

Numerosas persoas que querían facerse cunha praza nalgún dos cursos da Escola Oficial de Idiomas (EOI), congregáronse esta semana ás portas do centro, no barrio de Vite, para conseguir matricularse.

Aínda que as colas son habituais cada ano, segundo denuncian desde a Asemblea do Profesorado da EOI de Santiago, "este ano a situación é aínda peor". E é que, foron moitos os que estaban na cola, que empezou a formarse o mércores cara ao mediodía e que continuaba ao día seguinte, "e a ringleira deu a volta a todo ou edificio", explica o profesorado.

Por iso, non foron poucos os profesores que se achegaron ás portas da EOI para solidarizarse coa fila de alumnos para repartirlles café quente e pastas. Como explican, "a pesar das afirmacións da Consellería de Educación de que ningún alumno quedará sen praza na EOI de Galicia, "a ringleira que se crea en Santiago é cada ano maior", denuncian.

Por iso, esixen á Xunta a retirada da circular, que "disminúe a calidade do ensino eliminando profesorado". Os profesores din que o Plan da Xunta provoca que "se reduzan os grupos nas bandas horarias máis demandadas facendo inútil ou esforzo por matricularse", din.

Para ler a nova no seu lugar de orixe, preme aquí

Manu, ex do Lobelle, o noso mellor deportista

ASÍ O DECIDIRON os leitores de Santiagosiete que responderon á pregunta de quén é o noso mellor deportista. Tamén obtiveron moitos votos o xogador de squash Borja Golán e o futbolista do Deportivo, Iván Pérez.

Para ler a nova no seu lugar de orixe, preme aquí (Ver páxina 18)

Devoción no Rosario de Belén

Numerosos devotos participaron onte na procesión do Rosario na honra da Santísima Virxe de Nosa Señora de Belén, que partiu da igrexa parroquial de San Xoán Apóstolo. O encargado de portar o estandarte foi José Antonio Míguez, que estivo acompañado polo seu pai, Juan e o seu fillo, José Antonio.

• Galería de imaxes

Par ler a nova no seu lugar de orixe, preme aquí

Conxo e Vite pechan o calendario de festas populares na cidade

Os seus veciños sacaron en procesión as imaxes de San Serapio e a Virxe de Belén

Máis que en agosto, o mes por excelencia das grandes festas populares en Galicia, Santiago descóbrese ante este tipo de celebracións aínda máis en setembro. Media ducia de festas celebráronse na cidade desde que arrincou o mes. O pasado fin de semana coincidiron as da Mercé de Conxo, as de Casas Novas e as da Peregrina. E en Guadalupe, aínda que este ano non houbo festexos, os veciños non deixaron de sacar a imaxe da súa virxe en procesión, como fixeron nos outros tres barrios. Acompañoulles entón unha xornada estival, como a que tiveron onte quen seguiron as procesións de San Serapio e da nosa Señora de Belén. Porque as festas continuaron na cidade, polo menos ata onte, en que practicamente se pechou o calendario de celebracións parroquiais, aínda que aínda falta o Cruceiro da Coruña, que as organiza por San Miguel.

Conxo volveu vivir este fin de semana envolvido en aires festivos. Nesta ocasión, tocaba honrar a San Serapio, celebración tamén tradicional no barrio. O rosario partiu da praza de Praterías para recollerse no centro da parroquia que ata principios do século XX foi municipio independente, ata a súa anexión a Santiago. A imaxe do santo chegou subida a un guindastre ata a zona vella, desde onde foi baixada aos ombreiros ata Conxo, nunha comitiva que encabezou José Luis Vázquez Castro, portando o estandarte, e acompañado por Enrique Fernández Otero e José Luis Segade Ferreiro.

En Vite, as bombas de palenque deixáronse notar tamén durante a mañá de onte. Neste caso celebran á nosa Señora de Belén, cuxa imaxe saíu da igrexa de San Juan de Vista Alegre para percorrer o barrio. A música puxo fin en ambos os casos aos seus programas festivos, con sesións de baile ao mediodía e a noite.

Para ler a nova no seu lugar de orixe, preme aquí

A falta de aulas lastra o futuro da Escola Oficial de Idiomas

A directora recorda que non hai datas para o desenvolvemento dun edificio propio, para o que Raxoi cedeu os terreos ·· As colas volveron a protagonizar o inicio de matrícula no vello colexio de Vite

A algo máis de 3.500 prazas ascende a oferta educativa da Escola Oficial de Idiomas en Santiago que, do mesmo xeito que o curso pasado, conta con varias aulas cedidas no instituto de Sar, onde só se imparte inglés -ademais de seccións en Noia, Ordes ou Ribeira- e que onte abriu o prazo de matrícula, nunha xornada que, como xa é habitual, estivo marcada polas colas.

Ampliar a oferta con novos idiomas é algo que "nos encantaría se tivésemos centro", apunta a directora, Esperanza Moreira. O vello colexio de Vite reformado constitúe a sé da Escola Oficial de Idiomas, pero só conta con "trece aulas" que están freando a súa expansión. Moreira recorda que o Concello de Santiago cedeu unha parcela en Conxo para a construción dunha sé propia, aínda que "o novo goberno da Xunta non deu sinal" de ir a acometer este proxecto. Consultada respecto diso, a Consellaría de Educación comprometeuse a ofrecer información hoxe sobre os seus plans para a EOI de Santiago.

Do mesmo xeito que o curso pasado, o centro oferta sete idiomas -en 2008 incorporáronse Italiano e Español para estranxeiros á lista na que xa figuraban Inglés, Francés, Alemán, Italiano, Galego e Portugués. A demanda concéntrase de forma significativa nos grupos de Inglés, que concentran "case o 50%" do alumnado. No centro de Vite ofértanse para o próximo curso 1.140 prazas, e outras 840 en Sar. Para estudantes de Francés hai 555 prazas na oferta, e outras 380 para os de Alemán.

As colas de onte, moderadas no que se respecta aos cursos habituais da EOI -xa que só debían formalizar a súa matrícula os aprobados do ano anterior-, viuse incrementada pola oferta dun monográfico de Galego Administrativo, con 25 prazas que se asignarán por orde de solicitude, e que espertou gran interese entre os funcionarios.

• ARRANQUE DE CURSO CON POLÉMICA

Abertos a modificacións

Aínda que na páxina web da Escola Oficial de Idiomas de Santiago pódense consultar os horarios dos distintos grupos previstos en cada un dos idiomas que se ofertan, desde a dirección do centro advirten de que "é posíbel que teñamos que facer modificacións". Unha circular da Consellaría de Educación que "afecta á matrícula e aos cursos que pode impartir cada profesor" e que xerou polémica é a causa destes posíbeis cambios.

Polo que respecta ao cadro de profesorado, na EOI compostelana botan de menos un docente de Italiano, "que solicitamos e non nos deron", sinala a directora .

• AS CLAVES

Os aspirantes chegarán o día 22

O calendario de matrícula para alumnos novos abrirase en datas distintas en función dos idiomas. O prazo para Inglés, o idioma que maior interese levanta entre os aspirantes a novos alumnos, abrirase o día 22 e prevense, de novo, longas colas no centro de Vite.

Probas de nivel para os novos

Os aspirantes a matricularse en idiomas dos que xa teñen coñecementos previos deberán realizar probas de cualificación para determinar o seu nivel. Estes exames levaranse a cabo antes do día 8 de setembro e franquearanlles o aceso ás prazas que queden vacantes.

Os monográficos como alternativa

Ademais da oferta educativa convencional, que só na capital galega supera as 3.500 prazas, a Escola Oficial de Idiomas porá en marcha este curso monográficos de Inglés, Inglés Audiovisual, Francés, Galego, Portugués e Alemán, de pouco máis de dous meses de duración.

Esperas tamén ao longo da tarde

Malia que só se matriculaban os aprobados de cursos anteriores e os aspirantes ao curso de galego especializado para a administración, onte as colas mantivéronse ante a secretaría do centro durante toda a xornada.

Para ler a nova no seu lugar de orixe, preme aquí

O Auditorio de Galicia acollerá o décimo Congreso Internacional de Libros de Texto e Medios Didácticos

Os próximos días 3, 4 e 5 de setembro terá lugar no Auditorio de Galicia a décima edición do Congreso Internacional de Libros de Texto e Medios Didácticos, promovido pola Asociación Internacional pola Investigación e o Desenvolvemento dos Libros de Texto e os Medios Didácticos. No transcurso deste encontro está prevista a participación de 150 profesionais de recoñecido prestixio procedentes de diferentes ámbitos e nacionalidades relacionados coa temática dos libros de texto e os materiais do ensino. Entre eles, destacan membros de coñecidas asociacións de ámbito internacional, editores, profesores, investigadores e representantes de ministerios de educación, entre outros.

Algúns temas que se abordarán no congreso serán: como afectan os cambios políticos, sociais e económicos nas decisións sobre os recursos educativos; como se reflicte cada unha destas realidades no curso educativo e que ocorre coa cultura e a realidade emigrante e inmigrante que se recolle nos materiais.

Ademais das charlas e conferencias, poderase visitar na sala de exposicións a mostra Libros de texto e outros recursos didácticos elaborados en Galicia. Trátase dunha mostra concibida a tenor do décimo Congreso Internacional de Libros de Texto no que se dá a coñecer unha colección ampla e variada de materiais didácticos, tanto formais como informais de todos os niveis educativos, producidos por diversas institucións e asociacións de Galicia.

Obxectivos

A Asociación Internacional o desenvolvemento dos libros de texto ten como obxectivos fundamentais favorecer a investigación e a análise dos libros de texto e as ferramentas didácticas, así como favorecer a formación do profesorado en temas relacionados cos materiais do ensino.

É a primeira vez que este congreso con periodicidade bianual e de carácter internacional, se realiza en España. Os anteriores encontros tiveron lugar en Finlandia, Dinamarca, Noruega, Estonia, Eslovaquia e o último en Tonsberg, en Noruega, en setembro de 2007.

Para ler a nova no seu lugar de orixe, preme aquí

O miradoiro de Monte de Deus completarase con outros 25.000 metros

A segunda fase do proxecto de acondicionamento do cumio de Vite financiarase co Urbana Norte

Tan só os veciños de Vite e a súa contorna máis próxima, seguramente non todos, e un puñado de composteláns máis coñecían da existencia dun miradoiro sobre a cidade no alto do monte de Vite, concretamente no Monte de Deus. O departamento de Medio Ambiente está pondo todos os medios para recuperar un espazo desde o que é posíbel ver unha imaxe completa e diferente de Santiago, onde pode contemplarse tanto o máis próximo, como o propio barrio de Vite e o centro histórico, como localidades máis afastadas como Milladoiro, Os Tilos e A Estrada. A estampa pouco ten que envexar á que pode verse desde o alto do Pedroso.

Ao miradoiro de Monte de Deus, en Vite, chégase desde a avenida Castelao tomando a rúa Ulpiano Villanueva até a altura do cruzamento coa avenida do Burgo para ir cara á rúa Vite de Arriba. Deberá seguirse pola rúa dos Cabalos até a segunda desviación á dereita. O autobús urbano ten unha parada preto da igrexa de Vista Alegre e a rúa Diego Peláez, que pasa xunto ao templo e leva directo a Vite de Arriba.

Toda a zona ten unha extensión de 31.000 metros cadrados, dos que seis mil están xa preparados para recibir visitas. A instalación dun panel, que reproduce a mesma imaxe que pode ser vista en directo, axuda ao visitante a situarse perfectamente ao incluír unha lenda coa identificación dos edificios máis emblemáticos da cidade. Esta primeira fase do parque, que se inaugurou o pasado 20 de xuño, foi financiada polos fondos Feder, que achegaron 126.000 euros dos 180.000 euros do custo do proxecto.

Os que non coñecesen antes o miradoiro poderían non apreciar suficientemente o resultado final dos traballos, xa que foi necesario realizar a roza da abundante vexetación e eliminar gran cantidade de maleza que dificultaba o acceso á zona. Entre os traballos realizados destaca a instalación de mobiliario, o acondicionamento dun área de usos polivalentes e a mellora da contorna da fonte e lavadoiro, así como a apertura dun carreiro e a recollida de augas pluviais e a plantación dalgúns exemplares novos.

Aos seis mil metros cadrados que se acondicionaron xa no monte de Vite haberá que sumar proximamente outros case 25.000 metros cadrados no cumio máis alto do monte, entre as cotas 340 e 375. Esta peza limita cun gran anaco de xardín, que conta cunha edificación unifamiliar, mentres que alén linda cun muro de pedra e montes privados de eucaliptos e vexetación arbustiva. No máis alto hai pasteiros. O espazo que se acondicionará nesta segunda fase alberga unha mina de auga, que abastece o depósito de auga situado na parte baixa da parcela e que foi adaptado para a súa integración no recinto. Atendendo a normativa en materia de prevención de incendios, que obriga a substituír especies de alto índice de piroficidade por outras autóctonas, en Monte de Deus incorporaranse algunhas especies máis propias do país. Na actualidade, na parcela hai fundamentalmente arbustos (breixos, toxos e silveiras), piñeiros do país adultos e varios eucaliptos.

As obras de acondicionamento desta segunda fase do Monte de Deus estarán terminadas a finais deste ano. A seguridade da data do fin de obra vén determinada polo feito de que o proxecto se financiarán con cargo ao orzamento deste ano do Urbana Norte, polo que os traballos deberán estar listos para poder recibir a axuda europea.

Para ler a nova no seu lugar de orixe, preme aquí

«A zona vella é emblemática, é coma se vivises noutra época»

Para el, Santiago estaba un pouco mellor antes, «cando a xente era máis cordial, respectuosa e os mozos sabiamos divertirnos doutra forma diferente»

Héctor Juanatey Compostelán desde o berce, José Manuel Martínez Ares, máis coñecido como o Txino, recoñece que «non hai ninguén que sexa máis de Santiago que eu». O Txino criouse nos barrios máis emblemáticos de Santiago, primeiro en Pontepedriña e logo en Vite, lugar «onde realmente crecín xa que pasei aí toda a miña adolescencia».

Falar co Txino é como falarlle a alguén a quen coñeces desde fai moito tempo. Cunha amabilidade e unha confianza infinita, conta que lle custou elixir un recuncho de Santiago, porque hai millóns. «Loxicamente en El Matadero é onde paso máis tempo, pero tamén hai outros lugares que teño na memoria». Recorda entón o campo de fútbol da residencia do Campus Sur. «Pasei moitísimo tempo alí» «Xa sabes, cando faltabas algún día a clase ías ao campo a botar un partido e pasar un bo intre cos colegas».

De criarse en zonas emblemáticas, o Txino acabou creando o seu propio lugar de visita obrigada nas noites santiaguesas: El Matadero. Recoñece que «o da hostalaría é vocacional». «Sempre tiven don de xentes e quería vivir do contacto directo coas persoas». Aínda que os seus primeiros traballos foron nos concertos que se organizaban en Santiago, pronto comezaría a traballar de camareiro en varios locais da cidade, ás veces en máis dun ao mesmo tempo. A idea de montar o seu propio recuncho xurdiu dun amigo seu do barrio de Vite, Luis. «Un día díxome: 'Txino, ti o que tes que facer é montar o teu propio bar». «O problema loxicamente era que naquel momento eu non tiña suficiente pasta para facelo, pero co tempo a idea foi adiante».

Cando falar dos primeiros pasos do Matadoiro, conta que o fixemos todo entre tres colegas: eu e dous dos meus mellores amigos, os dous Luíses». «Todo o que se ve foi levantado por seis mans soamente». O pub naceu oficialmente o 13 de setembro do 2002, ano no que se foi a vivir á zona vella. «Sempre quixen vivir aí, é emblemática, dá a sensación de vivir noutra época». A partir de aí, sucederon tantas anécdotas que lle custa recordalas todas. Unha delas é o bulo que aínda hoxe en día corre de lingua en lingua, e é que o pub pertence a Luis Tosar. Deste recoñece que é «o meu mellor amigo, é como o meu irmán». Como un amigo máis, pisaba moito El Matadero e a xente prefería pensar que el era o xefe. Cousas da fama. «Até a miña familia chegoume a preguntar», recorda entre risas.

E é que detrás da barra tan só se atopa a figura do Txino. «é como a miña casa». Ninguén poderá negar que El Matadero ten un aura que, ao contrario que nos matadoiros, fai renacer as almas de todos os que dan cos seus pasos na entrada. O seu ambiente convértete en adicto a un local no que sempre que marchas, escoitarás un «grazas» de boca do Txino. Entón, xa non hai volta atrás. Sempre volverás.

Para ler a nova no seu lugar de orixe, preme aquí

Os barrios quedan sen servizos

Abundan os locais baleiros en varias áreas da cidade e non existe un proxecto de incentivos para a creación de comercio fose do centro histórico ou da zona centro

O período de crecemento sostido experimentado pola economía galega e máis particularmente polo sector da construción nestes últimos anos favoreceu á expansión da cidade, orixinando novas zonas e áreas residenciais infestadas de baixos e locais comerciais baleiros. Isto provocou que a falta de servizos sexa un feito palpábel ao que se enfrontan os veciños e veciñas dos barrios da cidade de Santiago.

Zonas como a de Santa Marta, Conxo, Vite, San Lourenzo ou Vista Alegre están desprovistas de comercios ou negocios que proporcionen aos seus veciños os servizos de primeira necesidade, o que provoca que teñan que desprazarse a outras zonas como a zona vella, o Ensanche ou as grandes superficies comerciais para realizar as súas compras diarias. En moitos destes barrios a situación non é nova e os seus veciños máis veteranos considérana de absoluta normalidade. María de la Concepción e Mercedes, dúas veciñas e amas de casa do barrio de Vite, aseguran desprazarse varias veces á semana ao centro da cidade para realizar as compras. «Aquí nunca houbo moita actividade e vos poucos comercios que abrían, ao intre pechaban pola falta de clientela». E é que moitos composteláns asumiron como normal a situación de deterioración do pequeno comercio local, tendo que desprazarse á zona centro ou ás grandes superficies para realizar as súas compras de diario.

Luís Matos, presidente da asociación de veciños Doutor Maceira de Conxo, asegura que nos últimos meses tiveron que baixar a persiana ao redor de seis negocios do barrio. «A crise está a desanimar aos comerciantes a abrir novos comercios na zona». A avenida de Ferrol, situada no barrio de Conxo, preséntase como unha das rúas de nova creación con máis locais baleiros de toda a cidade. A xente identifica a crise como a causa principal, pero, e se non é a única causa?, e se é certo que os composteláns prefiren os centros comerciais para realizar as súas compras? Luís Matos apunta á pixota que se morde a cola. «Non existen comercios nos barrios e os veciños acoden ás grandes superficies. O problema está en que cando un valente decide abrir un negocio, moita xente está xa afeita ao outro e non é doado mudar de hábitos».

Para romper con esta situación, o representante dos veciños desta zona do sur de Santiago asegura que están intentando coordinar a creación dunha asociación de comerciantes «que contribúa á posta en valor do barrio».

Yolanda Mallo é veciña de Conxo e asegura que se despraza a outros barrios á hora de facer a compra. «Hai demasiados bares mentres que faltan comercios doutro tipo». Alberto Varela, veciño de Vista Alegre e encargado da ferraxería Ferrva-Herrajes non está de acordo e afirma que «os grandes negocios péchanse nos bares», aludindo ao dereito ao bar. Segundo el, un dos grandes problemas do comercio de barrio reside na escaseza de prazas de aparcadoiro. O mesmo opina o seu veciño do Mesón do Pulpo, que ademais asegura perder a clientela fixa do menú do día nos últimos tempos. Cerca, outro santiagués reflexiona: se pechan o comercios e non abren outros, os barrios quedarán sen servizos perderase o faladoiro de carnizaría «porque a El Corte Inglés non se vai a falar. Vaise a comprar e en coche».

Para ler a nova no seu lugar de orixe, preme aquí

En Vite teñen que andar "a labazadas" cos bichos

Os veciños de Vite, especialmente os que residen na Avenida de Castelao, están fartos "de ver como as pólas das árbores entran polas fiestras de casa". E é que segundo algúns afectados "non podemos ventilar as vivendas. Temos que telo todo pechado porque entran bichos. Pasámonos a noite a labazadas con eles". Unha señora conta ademais que "son alérgica a estes animaliños e xa levo oito días a tratamento médico". Por todos estes motivos, os veciños piden ao Concello "que veñan a podar estas árbores". Engaden que "soltan un líquido apegañento".

Desde Raxoi, a edil de Medio Ambiente, Elvira Cienfuegos, explica que "si se podaron, pero este ano os tilos creceron máis que nunca polas choivas". E polo auga que caeu "enfermaron. Teñen fumagina", explica. "Son fungos que traen cochinillas e pulgóns e que producen un líquido azucrado. Estámoslle dando un tratamento ás árbores, e están respondendo". De todos os xeitos, "se molesta algunha póla, que nos avisen", conclúe.

Para ler a nova no seu lugar de orixe, preme aquí

'Lavaráselle a cara' ao Auditorio con nova cuberta e acesos

O teito plano de cobre está deteriorado polo efecto das gaivotas ·· Tamén se reformará o aparcamento, de acordo co Plan Director

A pesar de que fai só vinte anos que se levantou, o Auditorio de Galicia conta con algúns desperfectos provocados, entre outras razóns, pola presenza de gaivotas sobre as súas cubertas. As planchas de cobre que cobren a sala Ángel Brage están deterioradas e con risco de producir filtracións de auga, polo que a súa renovación é unha das actuacións prioritarias que contempla o Plan Director do edificio. A xunta de goberno municipal acordou onte sacar a concurso a obra de renovación da cuberta, cun orzamento de 121.593 euros e un prazo de execución de dous meses.

Outra das actuacións programadas para os próximos meses no Auditorio é a reforma do aparcamento subterráneo e os seus acesos, unha actuación que, cun orzamento de 258.620 euros, deberá estar completada en noventa días.

O goberno local tamén lle deu o visto bo onte ao proxecto e o inicio do expediente de contratación da reurbanización de Rosalía de Castro, desde a rotonda de enlace con Romeu Donallo até o periférico. O tipo de licitación neste caso ascende a 3,4 millóns de euros e súmase ás actuacións en Vista Alegre e a Avenida de Castelao, que se iniciarán nos próximos meses.

Para ler a nova no seu lugar de orixe, preme aquí