Preto de 4.000 composteláns viven no límite da pobreza

Nos barrios de Conxo, Vite ou Santa Marta hai varias zonas moi castigadas

A pobreza afecta en Compostela e comarca a uns 3.744 veciños. Son datos da enquisa de condicións de vida do Instituto Galego de Estatística (IGE) que, aínda que hai que matizar, revelan que un 7,29% de familias santiaguesas teñen dificultades económicas.
Segundo o IGE, falaríase de pobreza relativa sempre e cando os ingresos medios estean en 467 euros nas vivendas dunha persoa, 660 na de dúas e 809 na de tres. Destes hai moitos casos en Santiago, onde, segundo Cáritas, só o ano pasado preto de 500 familias víronse obrigadas a facer uso da caridade.

Sen chabolismo

Enseres, útiles do fogar, medicamentos, axudas para a alimentación ou para o aluguer foron as súas necesidades fundamentais. Precisamente en materia de vivenda, a concelleira de Benestar Social, Mar Martín, explicaba que, a diferenza doutras cidades galegas nas que aínda se dan casos de chabolismo, esta situación erradicouse en Santiago por completo.
"Aquí non hai asentamentos, e pouco a pouco xa vamos eliminando as infravivendas, ou as casas máis degradadas, das que segundo o noso censo ficarán entre seis e sete", comentaba a edil.
Aínda así, e como lembran desde Cáritas, cada vez é máis habitual que varias familias compartan piso en espazos bastante reducidos. "Sabemos de varios casos nos que hai un verdadeiro amoreamento nas vivendas. Dáse sobre todo con familias de inmigrantes, e non hai que irse até o rural para velo. En pleno Ensanche temos constancia de máis dun caso", explicaban desde Cáritas.

495 fogares da cidade recibiron axuda de Cáritas por vivir unha situación puntual de necesidade. Moitas destas achegas foron para o entorno próximo ao Hospital, Vite ou Santa Marta, lugares onde Cáritas máis axuda.